Danimarka ka nisur vendosjen e pajisjeve ushtarake dhe trupave të avancuara në Grenlandë, mes rritjes së tensioneve lidhur me rëndësinë strategjike të ishullit arktik dhe retorikës së re nga ShBA-ja, raportojnë mediat daneze.

Një komandë paraprake tashmë është dërguar në Grenlandë për të përgatitur logjistikën dhe infrastrukturën për mbërritjen e mundshme të forcave më të mëdha daneze dhe aleate, raportoi të mërkurën transmetuesi publik DR.

Roli i njësisë paraprake përfshin sigurimin që objektet dhe linjat e furnizimit të jenë të gatshme për pritjen e forcave kryesore në një fazë të mëvonshme.

Përforcimet pritet të përfshijnë ushtarë nga njësitë e Ushtrisë Daneze, me qëllim forcimin e pranisë së Forcave të Armatosura Daneze në ishull.

Megjithatë, një pjesë e madhe e kapaciteteve të mbetura luftarake të Danimarkës aktualisht është e angazhuar në detyrime të NATO-s në shtetet baltike.

Sipas zëdhënësit të partisë së majtë daneze Enhedslisten, trupave daneze së shpejti do t’u bashkohen edhe trupa ndërkombëtare.

“Kjo është diçka që e kemi kërkuar gjatë javës së kaluar. Është një hap i mençur. Dhe e kuptoj se trupa nga vende të tjera evropiane janë gjithashtu në rrugë drejt Grenlandës. Ky është sinjali i duhur për çdo fuqi të madhe që mund t’i shkojë mendja të sulmojë Grenlandën”, tha ai për DR.

Grenlanda, një territor vetëqeverisës brenda Mbretërisë së Danimarkës, ka tërhequr interesin e ShBA-së për shkak të pozicionit të saj strategjik dhe burimeve të mëdha minerale.

Danimarka dhe Grenlanda kanë refuzuar propozimet për shitjen e territorit, duke riafirmuar sovranitetin danez mbi ishullin.

Të martën, ministri danez i Mbrojtjes, Troels Lund Poulsen, konfirmoi planet për një prani ushtarake më të fortë dhe më të përhershme në Grenlandë.

“Ne tani po ecim përpara me të gjithë çështjen e një pranie më të madhe dhe më të përhershme në Grenlandë nga ana e mbrojtjes daneze, por edhe me pjesëmarrjen e vendeve të tjera”, u tha ai gazetarëve. “Ashtu si në vitin 2025, kur pamë se vende të tjera të NATO-s morën pjesë në aktivitete stërvitore dhe trajnuese në Grenlandë, edhe në vitin 2026 do të shohim diçka të tillë.”

Të dielën, Trump deklaroi se ShBA-ja duhet ta “marrë” Grenlandën për të parandaluar marrjen nën kontroll të ishullit nga Rusia ose Kina. Ai më herët e kishte përshkruar zotërimin e Grenlandës si një “domosdoshmëri absolute” për sigurinë ekonomike të ShBA-së, duke e krahasuar me një “marrëveshje të madhe pasurish të paluajtshme”.