Безбедносните сили се судрија со демонстрантите во аргентинскиот главен град Буенос Аирес во средата за време на протестот организиран од пензионери на кои им се приклучија фудбалските навивачи, синдикатите и прогресивните групи, што резултираше со најмалку 20 повредени.

Полицијата употреби солзавец и водени топови за да ги растера демонстрантите, меѓу кои имало и постари граѓани, жени и млади. Приведени се најмалку 103 лица.

На социјалните мрежи кружат снимки на кои се гледа како полицијата ги тепа и влече демонстрантите, вклучувајќи го и моментот кога 87-годишна жена се здобила со повреда на главата додека другите се обидувале да и помогнат.

Меѓу повредените е и аргентинскиот фоторепортер Пабло Грило, кој се здоби со сериозна повреда на главата откако беше погоден од солзавец додека известуваше од протестот. Грило бил пренесен во болница на лекување.

Некои љубители на фудбалот фрлаа стапови и конзерви кон полицијата, која одговори со штитови. Демонстрациите беа задушени со присуство на околу 800 полицајци.

Пензионерите, кои во среда попладне редовно протестираат пред Националниот конгрес, бараат повисоки пензии и подобри услови за живот.