Гласачите во Тенеси го избраа републиканецот Мет Ван Епс да го пополни испразнетото место во Претставничкиот дом на САД, консолидирајќи ја тесната предност на партијата на американскиот претседател Доналд Трамп во тоа тело, објавија американските медиуми.

Според медиумските проекции, вклучувајќи ги АП и Ен-Би-Си Њуз, Ван Епс, поранешниот комесар на Министерството за општи услуги на Тенеси, го победи демократскиот претставник Афтин Бен.

Ван Епс ќе го пополни местото испразнето од поранешниот претставник, конгресменот Марк Грин, кој поднесе оставка во јули.

И покрај тоа што изборите се одржуваат во дел од Америка со солидна републиканска база, гласањето во 7. конгресен округ се смета за тест за популарноста на претседателот Доналд Трамп за време на неговиот втор мандат.

Републиканците успеаја да победат на изборите, но со проектирана разлика што очигледно е под 22 процентни поени што ги постигнаа Трамп во ноември 2024 година.

Во 7-от округ во Тенеси, кој се протега од границата со Алабама до Кентаки и вклучува делови од градот Нешвил, ниту еден демократ не е избран на лидерската позиција во последните 40 години.

Трамп и претседателот на Претставничкиот дом на американскиот Конгрес, Мајк Џонсон, им ја честитаа изборната победа на републиканците во Тенеси на социјалните мрежи.