Европската комисија позитивно ја оцени реформската агенда на Босна и Херцеговина, клучен чекор за добивање на 976,6 милиони евра од инструментот на Европската унија за реформи и раст.
Комисијата заклучи дека реформската агенда, поднесена на 30 септември 2025 година, ги исполнува целите на Регулативата за помош за раст.
„Агендата ги дефинира приоритетните реформи за забрзување на зелената и дигиталната транзиција, зајакнување на развојот на приватниот сектор, задржување на талентите и зајакнување на основните права и владеењето на правото. Сега е до Босна и Херцеговина да го потпише и ратификува Договорот за помош и Договорот за заем“, објави Делегацијата на ЕУ во БиХ.
Доделувањето средства за Босна и Херцеговина, вклучително и претходното финансирање, може да започне дури откако ќе стапат во сила горенаведените договори и ќе бидат исполнети сите услови.
Планот за раст за Западен Балкан е мапа на патот за приближување на економиите на Западен Балкан кон Европската Унија.
Планот за раст вклучува шест милијарди евра за инвестиции во регионот, врз основа на принципот на инвестиции и реформи.
Исто така, обезбедува подготовка за пристапување кон единствениот пазар, што ќе им овозможи на граѓаните на Западен Балкан да ги искористат некои од раните придобивки од европската интеграција.
Исплатата на средствата ќе биде условена од успешното спроведување на Агендата за реформи, која вклучува реформи во фундаменталните области, како и социо-економски реформи, во соработка со Европската комисија.
Со ова одобрување, сите шест партнери од Западен Балкан сега усвоија Агенди за реформи и можат да имаат корист од Инструментот додека напредуваат на својот европски пат.
