Македонската претседателка Гордана Сиљановска - Давкова денеска попладне остварила телефонски разговор со српскиот претседател Александар Вучиќ.

Во разговорот како што информираат од кабинетот на Силјановска - Давкова биле потврдени одличните билатерални односи и била истакната подготвеност за натамошно унапредување на македонско - српското пријателство, за конкретизирање на соработката во повеќе области и јакнење на меѓусебната поддршка во однос на европските перспективи и процесите на евроинтеграција на двете земји.

Сиљановска – Давкова и Вучиќ се договориле на 2 Август заедно да го посетат манастирот Свети Прохор Пчињски.

“Во пресрет на државниот празник 2 Август – Илинден, а во духот на добрососедските односи и заложбите за продлабочување на пријателските врски меѓу двата народи, претседателката Сиљановска Давкова и претседателот Вучиќ, изразија подготвеност заеднички да го посетат манастирот Св. Прохор Пчински и да ја одбележат 80. годишнината од одржувањето на првото заседание на Антифашистичкото собрание на народното ослободување на Македонија (АСНОМ)”, се вели во соопштението од кабинетот на Сиљановска – Давкова.

Таа му се заблагодарила на српскиот престседател Вучиќ за помошта на Србија во справувањето со пожарите во Северна Македонија и ја потенцирала важноста од засилена регионална соработка во справувањето со природните катастрофи.