Арапско-исламскиот самит во главниот град на Катар, Доха, што се одржува по минатонеделниот израелски напад врз градот, ја покажува непоколебливата поддршка на исламскиот свет за оваа земја од Персискиот Залив, изјави денес турскиот претседател Реџеп Таип Ердоган.

„Нападот на Израел врз преговарачкиот тим на Хамас во Катар го подигна разбојништвото на Израел на сосема ново ниво“, изјави Ердоган во своето обраќање на вонредниот самит на Организацијата за исламска соработка (ОИС) и Арапската лига.

Тој го повика муслиманскиот свет да го засили притисокот врз Израел, велејќи дека економските мерки мора да се користат и за да се притисне Тел Авив.

Турскиот претседател нагласи дека муслиманските нации имаат „средства и способности да ги спречат експанзионистичките амбиции на Израел“, додека го осуди она што го опиша како „терористички менталитет на Израел кој се храни со хаос и крв“.

„Мора да ги интензивираме нашите дипломатски напори за зголемување на санкциите против Израел“, рече Ердоган, предупредувајќи дека „неоспорен факт е дека целта на владата на Нетанјаху е да продолжи со масакрот и геноцидот во Палестина, а воедно да го дестабилизира регионот“.

„Се соочуваме со израелскиот терористички менталитет кој се храни со хаос и крв, и со држава која го отелотворува тоа. Мораме да ги интензивираме нашите дипломатски напори за заострување на санкциите врз Израел“.

„Анкара ќе продолжи со непоколебливата борба до воспоставување палестинска држава врз границите од 1967 година, со територијален интегритет и Источен Ерусалим како главен град“, изјави Ердоган.

„Турција секогаш e со својот пријателски и братски сојузник Катар“, повтори претседателот, додавајќи дека Анкара е подготвена да ги сподели капацитетите на одбранбената индустрија со братските земји.

„Мораме да ја интензивираме соработката за да победиме во наредните децении“, додаде Ердоган.

Извор: ТРТ Ворлд и агенции