Агентите на американската Служба за имиграција и царина (ИЦЕ) почнаа да се распоредуваат на некои аеродроми во понеделник за да помогнат во безбедносните проверки, бидејќи отсуството на безбедносни службеници кои не примиле плата предизвикува огромни одложувања.

Министерството за внатрешна безбедност потврди дека започнало со распоредување на стотици агенти на ИЦE за да помогнат во обезбедувањето на аеродромите што се соочуваат со значителен недостиг на персонал, објави Ројтерс.

Тие се распоредени на 14 аеродроми, вклучувајќи ги Атланта, ЏФК во Њујорк, Кливленд, Питсбург, Феникс и Форт Мајерс.

Од аеродромот Хартсфилд-Џексон во Атланта, најпрометниот во САД, на патниците им било кажано да пристигнат најмалку четири часа порано за своите летови во понеделник.

Службениците за безбедност не добиваат плата поради блокирањето на државниот буџет, поради што голем број работници почнаа масовно да отсуствуваат од работа.

Трамп се закани во саботата дека ќе распореди агенти на ИЦE на аеродромите во понеделник ако не се усвои законот за финансирање на Министерството за внатрешна безбедност, чие одложување доведе до недостиг.

Предлог-законот со кој, меѓу другото, ќе се обезбеди плата за безбедносниот персонал на американските аеродроми не беше усвоен во Сенатот во петокот, откако демократите одбија да ја обезбедат потребната поддршка за негово усвојување.