Состанок на министрите за одбрана на НАТО пактот започна денес во седиштето на Алијансата во Брисел.

На состанокот, генералниот секретар на НАТО, Марк Руте, и министрите за одбрана и нивните заменици од 32-те земји на Алијансата ќе разговараат за клучните прашања за колективната безбедност на алијансата, како што се поддршката за Украина, инвестициите во одбраната и воената индустрија, како и безбедноста на Арктикот.

Се очекува по министерскиот состанок да се одржи состанок на министрите за одбрана на НАТО со новиот украински министер за одбрана, Михајло Федоров.

Исто така, беше најавен состанок на контакт групата за поддршка на Украина.

Министрите за одбрана на НАТО се состануваат денес за да го разгледаат напредокот од Хашкиот самит, вклучително и како членките на Алијансата ги исполнуваат обврските за зголемување на инвестициите во одбраната и производството во одбранбената индустрија, зајакнување на одвраќањето и одбраната и одржување на поддршката за Украина.

Исто така, ќе се разговара за подготовките за следниот самит на НАТО во Анкара, кој ќе се одржи на 7 и 8 јули 2026 година.

Се очекува министрите за одбрана да разменат мислења и за спроведувањето на сите мисии и активности предводени од НАТО, вклучително и КФОР, најдолгата и моментално најголемата мисија на Алијансата.