Британските војници распоредени во Норвешка ќе се удвојат од 1.000 на 2.000 во текот на следните три години, објави Џон Хили министерот за одбрана на Велика Британија.

Џон Хили го потврди зголемувањето на трупите за време на посетата на командосите на Кралската морнарица во кампот Викинг во северна Норвешка, додека Велика Британија го засилува своето присуство на Арктикот и на Далечниот Север.

Овој потег доаѓа во време на она што британската влада го опишува како растечка руска активност во регионот.

„Барањата за одбрана се зголемуваат, а Русија претставува најголема закана за безбедноста на Арктикот и Далечниот Север што сме ја виделе од Студената војна. Гледаме како Путин брзо го враќа военото присуство во регионот, вклучително и повторното отворање на старите бази од Студената војна“, рече Хили.

„Велика Британија презема чекори за заштита на Арктикот и Далечниот Север - удвојувајќи го бројот на војници што ги имаме во Норвешка и зголемувајќи ги заедничките вежби со сојузниците на НАТО“, додаде тој.

Соопштението се совпаѓа со потврдата дека вооружените сили на Велика Британија ќе играат улога во планираната мисија на НАТО „Арктички чувар“, при што детално воено планирање е во тек во седиштето на НАТО.

Хили треба да се сретне со министрите за одбрана во Брисел недела за да разговараат за предлозите.

Здружените експедициски сили (ЏЕФ) предводени од Велика Британија, исто така, ги истакнаа големите воени активности на Далечниот Север.

Вежбата „Лавовски аштитник“, закажана за септември, ќе вклучува обука на воздухопловните, копнените и поморските сили за заштита на критичната национална инфраструктура од напади и саботажи, како и подобрување на заедничките способности за команда и контрола.

Се очекува стотици лица да бидат распоредени низ Исланд, Данскиот теснец и Норвешка.

„Во рамките на „Студен одговор“ и „Лавовски заштитник“ оваа година илјадници војници ќе бидат распоредени низ Арктикот и Северниот Атлантик - а Велика Британија ќе го предводи патот. Заедно тренираме, заедно одвраќаме и, доколку е потребно, ќе се бориме заедно“, рече Хили.

Во март, 1.500 командоси на Кралската морнарица ќе учествуваат во вежбата на НАТО „Студен одговор“ низ Норвешка, Финска и Шведска.

Вежбата е дизајнирана да ја зајакне способноста на сојузниците да бранат стратешки важни локации на предизвикувачки терен, вклучувајќи фјордови и планини.

Плановите следат по Договорот од Луна Хаус потпишан со Норвешка во декември, според кој двете земји заеднички ќе управуваат со флота од воени бродови од типот 26 за лов на подморници, ќе ја прошират обуката на Арктикот и ќе ја позиционираат британската воена опрема во Норвешка.

Владата се обврза да ги зголеми трошоците за одбрана на 2,6% од БДП од 2027 година, опишувајќи го тоа како најголем одржлив пораст од крајот на Студената војна.

Стратешкиот одбранбен преглед, исто така, повика на подобрувања на одвраќачката позиција на НАТО во Северна Европа и Далечниот Север.

Британската влада, исто така, вели дека тоа ќе биде од клучно значење за северниот одговор на НАТО, бидејќи расте загриженоста за безбедноста во регионот.