Меѓународниот комитет за Аушвиц го повика германскиот федерален министер за внатрешни работи, Александар Добриндт, да ја започне постапката за забрана на партијата Алтернатива за Германија (AфД), наведувајќи дека партијата „целосно станала партија што масовно ја напаѓа демократијата“.

Претседателката на комитетот и преживеана од Аушвиц, Ева Умлауф, оцени дека Афд покажува „презир“ кон демократијата и повикува на нацистичката ера и обожавање на нацистичкиот канцелар Адолф Хитлер, што е „неподносливо“ за преживеаните од Холокаустот, објави „Шпигел“.

Извршниот потпретседател на комитетот, Кристоф Хојбнер, изјави дека надлежниот министер е должен да документира и политички да иницира одлука за, како што изјави, десничарскиот екстремистички и неуставен развој на АфД.

Добриндт претходно изрази скептицизам во врска со забраната, наведувајќи дека досега не е обезбедена потребната правна основа.

Постапките за забрана пред Федералниот уставен суд можат да ги покренат само Федералната влада, Бундестагот или Бундесратот.

Федералниот институт за заштита на Уставот ја класифицираше АфД во пролетта 2025 година како потврдена екстремистичка партија на национално ниво, но таа одлука во моментов е суспендирана поради судска постапка покрената од партијата.