Изјавата на украинскиот претседател Володимир Зеленски дека Европа и НАТО мора да ја обезбедат безбедноста на Украина за спроведување на изборите е врв на цинизмот, оцени денес Марија Захарова, портпаролка на Министерството за надворешни работи на Русија.

„Ова е, дури и за Зеленски, неочекувано смел потег. Ова е таков предизвик, дури и ако се земе предвид она што тој веќе го кажа. Не можам да замислам која било земја што би барала од другите земји да обезбедат спроведување на избори на територијата на Европската Унија, а во исто време да не изјави дека ја изгубила својата независност и суверенитет“, рече Захарова, пренесува Спутник.

Зеленски синоќа изјави дека е подготвен да учествува на претседателските избори, но дека нивното одржување зависи од две клучни работи - безбедноста на граѓаните и законските измени, и ги повика САД и ЕУ да помогнат во обезбедувањето услови за одржување на изборите.

Тој нагласи дека тврдењата дека владата „ја држи власта“ за да ја продолжи војната не се точни и додаде дека изборите можат да се одржат само со гаранции за безбедноста на граѓаните.

Зеленски ги повика САД и европските партнери да помогнат во создавањето услови за безбедно одржување на гласањето.

„Подготвен сум за изборите. Покрај тоа, ги молам САД, евентуално во соработка со европските партнери, да обезбедат безбедност за одржување на изборите. Тогаш Украина би била подготвена за нив во рок од 60-90 дена“, рече претседателот на Украина.

Претходно, американскиот претседател Доналд Трамп изјави дека Украина треба да одржи претседателски избори, тврдејќи дека украинските претставници ја користат војната како изговор за одложување на гласањето.

Европската комисија истакна дека изборите можат да се одржат само ако околностите го дозволат тоа, имајќи ја предвид агресијата на Русија.