Новиот германски канцелар Фридрих Мерц изрази поддршка за предлогот на американскиот претседател Доналд Трамп за 30-дневен „безусловен“ прекин на огнот меѓу Русија и Украина.

Мерц рече дека телефонски разговорал со американскиот претседател за најновите случувања во Украина и ги поддржал неговите напори за воспоставување прекин на огнот.

„Синоќа разговарав со американскиот претседател, тој ме информираше за неговиот план за 30-дневен прекин на огнот. Ја изразив мојата поддршка, бидејќи и ние во германската федерална влада веруваме дека ова е правилен потег“, изјави Мерц пред новинарите.

„Особено, од Русија сега се бара конечно да се согласи на подолг прекин на огнот, што мора да создаде можност за вистински мировен договор. Германија останува во многу близок контакт со Франција, Обединетото Кралство, Полска и други европски партнери по ова прашање“, додаде тој.

Трамп во четвртокот повика на 30-дневен „безусловен“ прекин на огнот меѓу Русија и Украина, велејќи дека тоа „на крајот треба да доведе до мировен договор“.

„Разговорите со Русија и Украина продолжуваат. САД повикуваат, идеално, на 30-дневен безусловно примирје.“

„Се надеваме дека ќе се почитува прифатлив прекин на огнот и дека двете земји ќе бидат одговорни за почитување на светоста на директните преговори“, напиша Трамп на својата платформа Truth Social.

Трамп предупреди дека доколку прекинот на огнот не се почитува, САД и нивните партнери ќе воведат дополнителни санкции.

Мерц одржа состаноци со водачите на ЕУ, Антонио Коста и Урсула фон дер Лајен.