Поддржувачите на Палестина во Лондон протестираа пред централата на британскиот јавен сервис Би-би-си, обвинувајќи ја медиумската куќа дека го прикрива геноцидот што Израел го спроведува во Газа.
Демонстрантите се собраа пред зградата на Би-би-си на Портланд Плејс со цел да изразат незадоволство од произраелскиот пристап на медиумот и прикривањето на воените злосторства под мотото „Ставете крај на прикривањето на геноцидот“.
Тие побараа Би-би-си да одговара пред јавноста и да го смени својот произраелски пристап кон вестите за палестинскиот народ и случувањата во Газа.
Носејќи палестински знамиња, демонстрантите извикуваа слогани како „Срами се Би-би-си“, „Би-би-си е соучесник во геноцидот“ и „Слободна Палестина“.
Фарис Амер во име на граѓанската организација „Форум за Палестина во Британија (PFB)“, во својот говор ја осуди пристрасноста на Би-би-си.
Посочувајќи дека Би-би-си неодамна ја одложил премиерата на документарецот што го прикажува животот на лекарите во Газа, Амер истакна:
„Сите многу добро знаеме дека овие документарци не ја раскажуваат целата приказна. Тие не прикажуваат дури ни мал дел од она што го видовме последните две години. Би-би-си веќе јасно покажа дека негова цел не е да информира. Негова цел е контрола – и тоа е токму она што се обидуваат да ни го направат денес.“
Амер нагласи дека обемот на случувањата во Газа не може да се дознае преку мејнстрим медиумите и додаде:
„Мора да се свртиме кон други извори на информации, кон независните медиуми. Нема да нѐ замолчат, нема да молчиме.“
Одлуката на Би-Би-Си да не ги емитува документарните филмови и вести за Палестина и Газа, како и нивното отстранување од дигиталните платформи, наиде на многу негативни реакции.
Во февруари Би-би-си го повлече од својата дигитална платформа iPlayer документарецот „Газа: Како да се преживее во зона на војна“, кој го опишуваше влијанието на војната врз децата и потоа се извини.
Повеќе од 500 телевизиски и медиумски професионалци, меѓу кои и познатите фудбалерот Гери Линекер и актерите Чарлс Данс и Халид Абдала, остро го критикуваа Би-би-си поради оваа одлука.
Неодамна британскиот радиодифузен сервис ја одложи и премиерата на документарецот за лекарите што работат во Газа за некој подоцнежен датум.
