Италијанската Генерална конфедерација на трудот (ЦГИЛ) повика на генерален штрајк во петок, 12 декември, првенствено поради објавениот буџет за следната година, а штрајкот може да го загрози функционирањето на училиштата, транспортот и здравствените услуги.

„Поради длабочината на социјалните немири, синдикатот е решен да го промени законот за буџетот, кој е неправеден и штетен за работниците, пензионерите и младите“, објави синдикатот ЦГИЛ, објави денес Ла Стампа.

Кога станува збор за железничкиот сообраќај, штрајкот ќе трае од полноќ до 21 часот во петок, 12 декември.

Во некои градови, локалниот транспорт може да работи под различен режим, единствен исклучок е Рим, каде што вработените во градската транспортна компанија нема да учествуваат во штрајкот, бидејќи веќе беа вклучени во претходен протест.

Противпожарната служба ќе штрајкува од 9 до 13 часот.

Училиштата ќе бидат масовно вклучени во протестот, па затоа некои часови ќе бидат откажани или одложени.

Во болниците и здравствените установи, можни се прекини во обезбедувањето на помалку неопходни услуги и забавување на помошните активности, додека јавните услуги би можеле делумно или целосно да бидат затворени во зависност од недостатокот на персонал.

Се очекува воздушниот сообраќај да се одвива нормално, но на патниците им се препорачува да ги проверат распоредите на летовите пред патувањето.