Украинскиот претседател Володимир Зеленски објави дека бројот на жртви во големиот руски напад врз Киев се искачи на четири, а десетици лица се повредени, меѓу кои деца и една бремена жена.

Нападот бил извршен во текот на ноќт а, а според Зеленски, Русите користеле околу 430 беспилотни летала и 18 ракети, вклучувајќи балистички и аеробалистички, објави Укринформ.

Главна цел на нападот бил Киев, додека регионите Киев, Харков и Одеса биле погодени, а прелиминарните извештаи укажуваат дека ракета Циркон била употребена во регионот Суми.

Азербејџанската амбасада во Киев била оштетена и од фрагменти од ракета Искандер.

Вкупно 27 лица биле повредени, меѓу кои две деца, а 15 лица биле хоспитализирани.

Локалните власти изјавија дека остатоците од беспилотни летала и пожарите оштетиле високи станбени згради, училиште, медицински објект и административни згради во градот со околу три милиони жители.

„Русите погодија станбени згради. Има многу оштетени повеќекатни згради, практично во секој округ“, напиша Тимур Ткаченко, началник на воената администрација во Киев, во апликацијата за пораки Телеграм.

Тој рече дека службите за итни случаи се испратени во неколку области.

Градоначалникот Виталиј Кличко рече дека системот за греење во Киев е исто така оштетен, при што еден округ е исклучен. Тој предупреди на можни прекини во снабдувањето со електрична енергија и вода.

Зеленски истакна дека нападот бил специјално „пресметан“ за да предизвика што е можно поголема штета на цивилите и инфраструктурата.

Тој ја повика меѓународната заедница да употреби санкции за да ги запре ваквите напади и ја нагласи потребата да се прекине продажбата на руска нафта и финансиските текови што ги поддржуваат нападите.

Итните служби продолжуваат со спасувачките операции, а на сите повредени им е укажана медицинска помош.