Трговскиот договор меѓу Европската Унија и јужноамериканскиот блок Меркосур ќе почне да се применува привремено од 1 мај, објави денес Европската комисија, што значи укинување на царинските давачки за повеќето стоки од двете страни.

Портпаролот на Европската комисија потврди дека Брисел испратил известување до Парагвај, кој моментално претседава со Меркосур, што беше последен чекор за започнување на привремената имплементација на договорот што земјите-членки на ЕУ го поддржаа на 9 јануари, објави Еурактив.

Привремената примена ќе се однесува само на земјите што го одобриле договорот и ја известиле ЕУ, а тоа се моментално Аргентина, Бразил и Уругвај, додека Парагвај сè уште не го доставил известувањето.

Договорот ќе остане во сила до крајот на процесот на ратификација во ЕУ во наредните години, откако Судот на правдата на ЕУ ќе донесе одлука за неговата компатибилност со правото на Унијата, во постапка иницирана од членови на Европскиот парламент.

Европската комисија наведува дека компаниите, потрошувачите и земјоделците ќе можат веднаш да ги почувствуваат придобивките од договорот, додека чувствителните земјоделски сектори ќе бидат заштитени со посебни механизми што стапуваат во сила на почетокот на април.

Европскиот комесар за трговија Марош Шефчович оцени дека привремената примена е важен чекор кон постигнување на целите на договорот, вклучувајќи ги и новите можности за трговија, раст и вработување.

Одлуката за спроведување на договорот предизвика спротивставување на некои земји, вклучително и Франција, чии претставници сметаат дека тој ги крши демократските принципи, како и постапките на членовите на Европскиот парламент кои долго време се спротивставуваа на овој договор.