Бугарската влада одлучи да го повлече нацрт-буџетот за 2026 година по протестите низ целата земја, објави порталот „Новините“.

Одлуката следеше по вчерашните протести, поради предлог-буџетот, прв во евра, валутата што земјата ќе ја усвои на 1 јануари, што предвидува зголемување на даноците и придонесите за социјално осигурување во приватниот сектор и насочување на повеќе средства кон државниот сектор.

Неколку десетици илјади луѓе учествуваа во протестите во Софија, а демонстрации се одржаа и во поголемите градови како што се Варна, Пловдив, Бургас, Стара Загора, Добрич, Сливен, Велики Трново, Шумен, Русе, Ловец, Благоевград.

Некои демонстранти се судрија со полицијата, која ги блокираше канцелариите на владејачките партии во Софија, а на протестот во Варна беа присутни и навивачи, кои организаторите ги повикаа да не придонесуваат за ескалација на ситуацијата.

Слични тензии беа забележани и во Софија, каде што демонстрантите стоеја пред бината на Плоштадот на независноста со покриени лица, а некои од нив фрлаа камења, шишиња и петарди кон полицајците.

Советот на министри формално му предложи на Народното собрание да усвои резолуција за повлекување на предлог-законот за државниот буџет.

Владата објави дека ќе бидат повлечени и предлог-финансиските рамки за Државното социјално осигурување (ДСO) и Националниот фонд за здравствено осигурување (НЗФО), а по формалното повлекување во Парламентот, владата планира нова постапка за буџетирање.

Министерката за финансии Теменузка Петкова најави разговори со синдикатите и работодавачите со цел прилагодување на буџетот за следната година, додека опозицијата сега бара целосна оставка на владата, а не само измени во финансискиот план.

По слични протести на 28 ноември, малцинската влада на Росен Жељазков вети дека повторно ќе го поднесе планот за трошење за 2026 година во парламентот, со цел да се овозможи повеќе време за консултации со опозициските партии, синдикатите и работодавачите.

Парламентарната комисија го усвои буџетскиот план на прво читање на 18 ноември.

Околу половина од Бугарите се противат на усвојувањето на еврото, плашејќи се дека тоа ќе го загрози суверенитетот на земјата и дека трговците ќе го искористат преминот од националната валута лево на евро за да ги зголемат цените, објави Ројтерс.

Претседателката на Европската централна банка, Кристин Лагард, овој месец предупреди дека инфлацијата би можела да се зголеми кога балканската земја ќе се приклучи на еврозоната.