Një koalicion maroken kërkoi të mërkurën t’i jepet fund dominimit të gjuhës frënge në arsim, administratë dhe sektorë të tjerë, duke theksuar nevojën për forcimin e gjuhës arabe.

Në një deklaratë me rastin e Ditës Botërore të Gjuhës Arabe, Koalicioni Kombëtar Maroken për Gjuhën Arabe tha se një e ardhme gjuhësore më gjithëpërfshirëse në vend mund të arrihet vetëm përmes zbatimit efektiv të statusit zyrtar të gjuhës arabe në të gjitha fushat e jetës.

Koalicioni theksoi se kjo kërkon një “politikë gjuhësore të qartë dhe vendimtare” për ta bërë arabishten gjuhën kryesore në arsim, qeverisje, financa, biznes dhe sektorë të tjerë kyç, duke i dhënë fund njëkohësisht dominimit të frëngjishtes.

Ai kërkoi që institucionet publike dhe kompanitë private të detyrohen të përdorin arabishten ose amazighishten (berberishten) në dokumentet zyrtare, shërbimet dhe korrespondencën, në përputhje me rregulloret ligjore.

Disa organizata të shoqërisë civile kanë kritikuar përdorimin e vazhdueshëm të frëngjishtes nga institucionet shtetërore, organizatat joqeveritare (OJQ) dhe bankat.

Kushtetuta e Marokut, në nenin 5, përcakton se “arabishtja është gjuha zyrtare e shtetit dhe shteti do të punojë për ta ruajtur, zhvilluar dhe promovuar përdorimin e saj”, duke shtuar se amazighishtja është gjithashtu gjuhë zyrtare dhe pjesë e trashëgimisë së përbashkët të të gjithë marokenëve.

Megjithatë, përdorimi i vazhdueshëm i frëngjishtes ka qenë objekt polemikash, veçanërisht që nga hyrja në fuqi në gusht të vitit 2019 e ligjit për reformën në arsim, i cili lejon që disa lëndë të mësohen në frëngjisht.

Kjo politikë ka nxitur kundërshtime të forta nga partitë politike dhe grupet civile, të cilat e shohin frëngjishten si një trashëgimi të sundimit kolonial dhe kundërshtojnë praninë e saj të vazhdueshme në sistemin arsimor.