Ministria siriane e Mbrojtjes njoftoi të hënën se ka përfunduar një operacion ushtarak kundër mbetjeve të regjimit të rrëzuar të Bashar al-Assad në provincat bregdetare të Latakias dhe Tartusit.

"Forcat tona kanë neutralizuar me sukses qelizat e sigurisë dhe mbetjet e regjimit të mëparshëm në qytetet Al Mukhtareyah, Muzayraa dhe Al-Zubar në Latakia, si dhe në Ad Dali, Ta'nita dhe Al Qadmus në Tartus, duke siguruar zonën dhe duke eliminuar kërcënimet", tha zëdhënësi i ministrisë, Hassan Abdul Ghani, sipas agjencisë shtetërore të lajmeve SANA.

Ai shtoi se institucionet publike tani janë në gjendje të "vazhdojnë punën dhe të ofrojnë shërbime bazë për qytetarët, duke mundësuar kthimin në jetën normale dhe forcimin e sigurisë dhe stabilitetit".

Forcat siriane, thotë ai, kanë arritur të zmbrapsin sulmet e mbetjeve të regjimit të mëparshëm dhe oficerëve të tij dhe t'i largojnë ata nga pikat kryesore strategjike. Shumica e rrugëve kryesore që ata përdorën për të sulmuar civilët tani janë të siguruara.

Ai theksoi se shërbimet e sigurisë do të shtojnë përpjekjet në fazën tjetër për të garantuar stabilitetin, ruajtjen e sigurisë dhe mbrojtjen e popullatës. Ministria e Mbrojtjes ka zhvilluar gjithashtu "plane të reja për të vazhduar luftën kundër mbetjeve të regjimit të mëparshëm, për të eliminuar kërcënimet e ardhshme dhe për të parandaluar riorganizimin e qelizave kriminale".

Abdul Ghani theksoi se komisionit hetimor do t'i jepet "liri e plotë" për të hedhur dritë mbi rrethanat e konfliktit, për të verifikuar faktet dhe për të siguruar drejtësi për viktimat.

Javën e kaluar, provincat bregdetare të Latakias dhe Tartusit ishin skena e sulmeve të koordinuara nga besnikët e Asadit, më intensivet që nga rënia e regjimit, duke synuar patrullat e sigurisë dhe pikat e kontrollit, duke shkaktuar viktima.

Pas rënies së regjimit të Asadit në dhjetor, autoritetet e reja siriane nisën një iniciativë për të rregulluar statusin e ish-anëtarëve të forcave ushtarake dhe të sigurisë, me kusht që ata të dorëzonin armët dhe të mos merrnin pjesë në krime lufte.

Megjithëse dhjetëra mijëra ish-anëtarë të regjimit e pranuan iniciativën, disa grupe të armatosura, veçanërisht në zonat bregdetare ku ishin vendosur oficerë të lartë të Asadit, refuzuan të dorëzoheshin.

Këto grupe janë tërhequr në zonat malore, duke destabilizuar rajonin dhe duke kryer sulme të herëpashershme ndaj forcave qeveritare në javët e fundit.

Assad, i cili sundoi Sirinë për gati 25 vjet, iku në Rusi më 8 dhjetor 2024, duke i dhënë fund sundimit të Partisë Baath për dekada.

Ahmed al-Sharaa, udhëheqësi i forcave që rrëzuan Asadin, u shpall president i përkohshëm më 29 janar.