Kina iu bashkua sot një numri gjithnjë e më të madh vendesh në mbarë botën për ta kundërshtuar njohjen izraelite të Somalilandit, rajon separatist i Somalisë.
“Kina është e shqetësuar dhe e kundërshton me vendosmëri këtë veprim”, tha zëdhënësi i Ministrisë së Jashtme, Lin Jian, në përgjigje të një pyetjeje mbi vendimin e Tel Avivit për ta njohur Somalilandin javën e kaluar.
Duke kujtuar refuzimin dhe dënimin e këtij vendimi nga vende të ndryshme dhe blloqe shumëkombëshe, Jian tha se “Kina mbështet fuqimisht sovranitetin, ribashkimin dhe integritetin territorial të Somalisë, pasi Somaliland është pjesë e patjetërsueshme e vendit”.
Pekini kundërshton çdo veprim që cenon territorin e Somalisë. “Çështja e Somalilandit është tërësisht çështje e brendshme e Somalisë dhe duhet të zgjidhet nga populli somalez në një mënyrë që respekton kushtet kushtetuese të Somalisë”, tha Jian.
“Vendet jashtë rajonit duhet t’i ndalojnë ndërhyrjet e papërshtatshme. Asnjë vend nuk duhet t’i ndihmojë dhe t’i mbështesë forcat separatiste në vende të tjera për përfitime të veta egoiste”, shtoi ai.
Zëdhënësi i ministrisë gjithashtu u bëri thirrje autoriteteve të Somalilandit të “kuptojnë qartë se ku po shkojnë gjërat” dhe të ndalojnë menjëherë çdo kurs separatist dhe “përplasje me forcat e jashtme”.
Izraeli u bë vendi i parë në botë që premtoi ta njohë Somalilandin si shtet sovran, duke shkaktuar një valë refuzimi ndërkombëtar ndaj këtij vendimi nga shumë vende të Afrikës dhe Lindjes së Mesme, përfshirë Türkiyen, e cila gjithashtu është bashkuar me deklaratat e ashpra të lëshuara nga Katari.
Somalilandi, i cili nuk ka marrë njohje zyrtare ndërkombëtare që nga shpallja e pavarësisë nga Somalia në vitin 1991, vepron si një entitet “de facto” i pavarur administrativisht, politikisht dhe në aspektin e sigurisë, megjithëse qeveria qendrore mbetet e paaftë të ushtrojë kontroll mbi rajonin dhe gjithashtu e paaftë të sigurojë njohje ndërkombëtare të pavarësisë.
Qeveria e Somalisë refuzon ta njohë Somalilandin si shtet të pavarur, duke e konsideruar atë pjesë integrale të territorit të saj dhe e sheh çdo marrëveshje ose angazhim të drejtpërdrejtë si shkelje të sovranitetit dhe unitetit të vendit.
