Kryeministri belg Bart De Wever paralajmëroi të enjten se konfiskimi i drejtpërdrejtë i aseteve ruse do të përbënte një akt lufte dhe do të kishte pasoja serioze për sistemin financiar evropian.

Duke folur në kuadër të Forumit Ekonomik Botëror në Davos të Zvicrës, gjatë “Mëngjesit Ukrainas 2026”, De Wever theksoi se Evropa nuk është në luftë me Rusinë dhe se sekuestrimi i njëanshëm i aseteve do të ishte i paprecedent.

“Nuk mundesh thjesht t’ia marrësh dikujt paratë. Ne nuk jemi në luftë me Rusinë. Evropa nuk është në luftë me Rusinë. Nuk mund thjesht të konfiskosh para. Ky është një akt lufte. Nuk duhet nënvlerësuar, nuk ka ndodhur kurrë në histori”, tha De Wever.

Ai nënvizoi se Evropa ka zgjedhur të imobilizojë asetet e Bankës Qendrore të Rusisë, shumica e të cilave mbahen në Belgjikë përmes Euroclear, për një periudhë të pacaktuar.

“Paratë e imobilizuara, madje edhe gjatë Luftës së Dytë Botërore, nuk janë konfiskuar kurrë. Kjo do të ishte hera e parë në histori që ndodh diçka e tillë dhe do të kishte pasoja të rënda për Evropën, për besimin dhe sigurinë në sistemin financiar të eurozonës”, shtoi ai.

De Wever vuri në dukje kompleksitetin e vendimmarrjes evropiane, duke paralajmëruar se konfiskimi i plotë i aseteve ruse mund të kthehej kundër Evropës nëse më vonë vendoset heqja e sanksioneve, duke e detyruar BE-në të rimbursojë fondet e sekuestruara.

Megjithatë, ai pranoi përgjegjësinë e Evropës për financimin e Ukrainës, duke theksuar se blloku ka angazhuar 90 miliardë euro për këtë vit dhe vitin e ardhshëm.

“Financimi i Ukrainës është i garantuar dhe asetet do të mbeten të imobilizuara deri në fund të luftës, që do të thotë se, siç ka ndodhur gjithmonë në histori, kur të ketë një marrëveshje paqeje, asetet do të jenë pjesë e negociatave. Dhe dua të jem shumë i qartë: në atë moment… çdo cent i atyre parave do të përdoret për shlyerje dhe rindërtimin e Ukrainës”, tha ai.

“Do të isha shumë i trishtuar të shihja një euro që kthehet në Moskë, por duhet të respektojmë të drejtën ndërkombëtare. Kjo do të ndodhë në atë moment dhe deri atëherë Evropa do të financojë luftën në Ukrainë ashtu siç duhet”, shtoi De Wever.

Rreth 210 miliardë euro asete ruse mbeten të ngrira brenda Bashkimit Evropian.