Претседателот на Туркије, Реџеп Таип Ердоган, изјави дека неговата земја постигнала опипливи резултати за мир во војната Украина-Русија и дека може да продолжи да го прави тоа, јавува Анадолу.

„Досега обезбедивме опипливи резултати што му служат на мирот во украинско-руската војна. Се случија многу значајни случувања, почнувајќи од размена на затвореници до воспоставување коридор за жито“, им рече Ердоган на новинарите во авионот при враќањето од посетата на Египет.

„Дури и ги собравме страните во Туркије во повеќе наврати. Може повторно да го направиме тоа и да ја отвориме вратата за мир со управување со процесите ориентирани кон решенија, без надворешни влијанија“, додаде тој.

Ердоган рече дека во разговорите и со рускиот претседател Владимир Путин и со украинскиот претседател Владимир Зеленски, Туркије продолжува со напорите во оваа потрага.

Тој истакна дека Анкара нема да се откаже од стремежот за мир, и додаде: „Ќе продолжиме да правиме сѐ што може за да постигнеме мир.“