Во последните четири месеци загинаа 30.000 Палестинци. Ова не е само статистика, туку месото и крвта на палестинскиот народ, изјави денес јужноафриканскиот амбасадор во Холандија, Вуси Мадонсела, пред Меѓународниот суд на правдата (МСП).

„Овој пркос на Израел веќе доведе до убиство на десетици илјади Палестинци, вклучително и околу 30.000 убиени само во изминатите четири месеци“, рече Мадонсела пред судот за време на јавните сослушувања.

Тој потсети дека светот во Газа од 7 октомври сведочи на напад кој со невидена брзина и сериозност ги крши најосновните права за опстанок на населението.

Мадонсела ја критикуваше меѓународната заедница за нејзината „неподготвеност да бара одговорност од Израел за нејзините политики и практики“.

Јавните сослушувања започнаа денес во Хаг по барањето на Генералното собрание на ОН за советодавно мислење за правните последици што произлегуваат од политиката и практиките на Израел на окупираната палестинска територија, вклучително и во Источен Ерусалим (Ал Кудс).

Вкупно 52 земји, меѓу кои и Туркије, како и Арапската лига, Организацијата за исламска соработка и Африканската унија, ќе одржат 30-минутни усни презентации.

На денешната седница, покрај Јужна Африка, своите аргументи ќе ги изнесат и Алжир, Саудиска Арабија, Холандија, Бангладеш и Белгија.

Во израелските напади врз Појасот Газа од 7 октомври досега загинаа 29.195 Палестинци.

По обвинението за геноцид што го поднесе Јужноафриканската Република на 22 јануари, Меѓународниот суд на правдата пресуди дека Израел мора да се воздржи од какви било активности поврзани со убиства, напади и уништување на жителите на Појасот Газа и да ги преземе сите мерки за да спречи геноцид.

Меѓутоа, израелските сили и понатаму продолжуваат со нападите врз Појасот Газа.

Според Обединетите нации, поради израелската офанзива, 85 отсто од населението на Појасот Газа е внатрешно раселено и се соочува со акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена.

Официјалната бројка на загинати во Израел изнесува 1.200, но, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.