Претседателот на Црна Гора, Јаков Милатовиќ, денеска го прими европскиот комесар за соседство и проширување, Оливер Вархеји, кој е во официјална посета на Подгорица.

Од кабинетот на Милатовиќ соопштија дека на средбата било констатирано дека Црна Гора мора да ја искористи големата можност и поволен момент за да го забрза својот европски пат и оти нејзиниот пристап е начин за заживување на процесот на проширување на Европската унија.

Претседателот Милатовиќ повтори дека полноправното членство во ЕУ е приоритетна надворешнополитичка цел на земјата и дека неговиот петгодишен мандат е целосно посветен на тоа.

Тој укажа на атмосферата на консензус и политички дијалог меѓу политичките актери во Црна Гора за сите важни прашања, што е најдобар показател дека обврските од европската агенда се во фокусот на политичките субјекти, бидејќи тоа е цел што треба да се исполни поради огромниот број граѓани кои ја поддржуваат интеграцијата во ЕУ .

Милатовиќ и еврокомесарот за проширување ја истакнаа важноста од подобрување на соработката меѓу Црна Гора и ЕУ.

Милатовиќ го повтори очекувањето дека Црна Гора, како лидер во преговарачкиот процес, ќе стане полноправна членка на Европската унија до 2028 година.

На средбата беше заклучено и дека проектот „План за раст“ може на поедноставен начин да ги доближи придобивките од членството до граѓаните и да даде можност за раст на економиите на земјите од Западен Балкан, пред се преку инвестиции во транспортната инфраструктура, енергетскиот сектор и земјоделството.

Претседателот на Парламентот на Црна Гора Андрија Мандиќ денеска се сретна и со комесарот Вархеји.

Од неговиот кабинет беше соопштено дека Мандиќ на средбата посочил дека Собранието на Црна Гора го спроведе сето она што го разговарале при неговата официјална посета на Унгарија и дека е дојдено време да се зборуваат резултати, а не реторика.

Европскиот комесар за соседство и проширување Вархеји, исто така, на средбата со Мандиќ рече дека Парламентот на Црна Гора исполнил се што разговарале во Будимпешта во рокот и додаде дека тоа е реткост кога станува збор за другите политички структури кои некогаш ја конституирале владата во Црна Гора.

Вархеји додаде дека Европската комисија високо ги цени напорите на Црна Гора и истакна дека имаат соработка со претседателот Мандиќ, премиерот и претседателот на државата, која ја карактеризира како „силна политичка структура која е повеќе од коалиција“.

Еврокомесарот ја истакна важноста од валоризирање на хидроенергетскиот потенцијал преку големи инфраструктурни проекти, што значи и подобра регионална соработка, еден од клучните фактори на патот кон влезот во Европската унија.