„Пред седум години дојдов овде како тинејџер за да го остварам мојот сон да играм кошарка на највисоко ниво. Мислев дека кариерата ќе ја поминам овде и многу сакав да ви ја донесам шампионска титула. Љубовта и поддршката што сите ми ги дадовте е повеќе отколку што можев да сонувам“, напиша Дончиќ на Х.

„За едно младо дете од Словенија што доаѓа во САД за прв пат, направивте во северен Тексас да се чувствувам како дома. Во добри и лоши времиња, од повредите до финалето на НБА, вашата поддршка никогаш не се промени. Ви благодарам не само што ја споделивте мојата радост во нашите најдобри моменти, но и поради тоа што вашата поддршка ме подигна кога најмногу ми требаше.

„Додека го започнувам следниот дел од моето кошаркарско патување, заминувам од град во кој секогаш ќе се чувствувам како дома далеку од дома“, рече 25-годишниот играч.

Седум години откако беше трејдуван во Маверикс за време на драфтот во НБА во 2018 година, Дончиќ е нов кошаркар на ЛА Лејкерс, придружувајќи му се на Леброн Џејмс.

Лејкерси освен Дончиќ ги добија крилните центри Макси Клебер и Маркиф Морис, а Лејкерси го испратија во Далас крилниот центар Ентони Дејвис, бекот Макс Кристи и идниот избор на драфтот во првата рунда.

ЛА Лејкерс денеска го пречекаа словенечкиот кошаркар во Лос Анџелес, кој изјави дека е благодарен за одличната можност да игра за Лос Анџелес Лејкерс.

„Благодарен сум за оваа одлична можност. Кошарката ми значи се, без разлика каде играм. Ќе играм со иста радост, страст и цел - да освојувам титули", им порача Дончиќ на навивачите на ЛА Лејкерс.

Словенечката ѕвезда има 12.089 поени, 3.655 скока и 3.489 асистенции и е еден од двајцата играчи во историјата на НБА кои забележале најмалку 10.000 поени, 3.000 скока и 3.000 асистенции во нивните први 400 натпревари во кариерата по Оскар Робертсон.