Регионалната влада на Њу Делхи за прв пат предизвикала вештачки дожд над градот Њу Делхи за да го растера токсичниот смог што веќе неколку дена го обвива индискиот главен град.

Владата, во соработка со Индискиот институт за технологија Канпур, во четврток го спровела првиот тест со едномоторен авион Цесна над Бурари, град кој се наоѓа на север од Федералната територија Делхи.

„Беше извршен пробен лет за време на кој беа испукани ракети за распрснување на облаци“, изјави Манџиндер Синг Сирса, министер за животна средина на Делхи.

Градоначалникот Река Гупта, изјави дека се надева оти доколку условите бидат поволни, индискиот главен град ќе го добие својот прв вештачки дожд на 29 октомври.

Експертите истакнуваат дека, иако овој вид експеримент со облаци треба да донесе почести и пообилни врнежи отколку што би било поинаку, неговиот ефект е често мал.

Овој процес, исто така, бара присуство на облаци, а тие често се отсутни во Њу Делхи во текот на зимата кога загадувањето е највисоко.

Њу Делхи, со повеќе од 30 милиони луѓе, редовно се рангира меѓу најзагадените главни градови на планетата, а секоја зима, студениот воздух останува заробен под потоплиот воздух, што формира „капа“ што го спречува густиот, токсичен облак од остри мириси создадени од фабриките, сообраќајот и земјоделските палења да се распрснат понатаму.

Нивото на ПM2.5 честички- најопасните бидејќи се апсорбираат директно во крвта, некои денови достигнуваат до 60 пати повеќе од максималното дневно ниво препорачано од Светската здравствена организација.

Од почетокот на неделата, нивото на загадување се зголеми, особено по Диали, хиндуистичкиот фестивал на светлата, за време на кој жителите палат пиротехнички ракети и петарди.

Во зори во вторник, нивото на микрочестички ПM2.5 достигна повеќе од 56 пати повеќе од дневната граница, според податоците од швајцарската компанија ИКЈУАир, специјализирана за следење на квалитетот на воздухот.