Американскиот претседател Доналд Трамп изјави дека САД се во дијалог со кубанските власти што би можел да заврши со договор, по неговите бројни закани кон карипската земја.
„Разговараме со народот на Куба, со највисоките функционери во Куба. Ќе видиме што ќе се случи, но мислам дека ќе постигнеме договор со Куба“, изјави американскиот претседател Доналд Трамп пред новинарите во Флорида.
Откако беше соборен претседателот во Венецуела, главниот сојузник на Куба, Доналд Трамп постојано ѝ се заканува на владата на комунистичкиот остров.
Зборувајќи за „неуспешна“ и „нестабилна“ земја, тој истакна дека Куба „веќе ја нема Венецуела да ја поддржува“.
Трамп, кој веќе ги прекина испораките на венецуелска нафта до Куба по апсењето на Николас Мадуро на почетокот на јануари, во четврток потпиша извршна наредба што им овозможува на САД да воведуваат тарифи за земјите што продаваат нафта на Хавана.
Вашингтон ја наведува „исклучителната закана“ што ја претставува Куба, карипски остров кој се наоѓа само 250 км од брегот на Флорида, за националната безбедност на САД.
Ги обвинува кубанските власти дека имаат односи со бројни земји, меѓународни терористички организации и актери кои се непријателски настроени кон САД и ги поддржуваат, вклучувајќи ги Русија, Кина, Иран, Хамас и Хезболах.
Куба е исто така обвинета за „дестабилизирање на регионот преку имиграција и насилство“, а истовремено „ширење на своите комунистички идеи, програми и практики“.
Од друга страна, Хавана го обвинува Трамп дека сака да ја „задуши“ економијата на островот, каде што дневните прекини на електричната енергија стануваат сè почести, а редовите на бензинските пумпи стануваат подолги.
Мексиканската претседателка Клаудија Шајнбаум во неделата објави нови пратки хуманитарна помош за Куба откако САД се заканија со царини за добавувачите на нафта на социјалистичкиот карипски остров.
„Оваа недела планираме хуманитарна помош за Куба... во форма на храна и други производи, додека преговараме преку дипломатски канали поврзани со испорака на нафта од хуманитарни причини“, рече Шајнбаум.
Таа изјави дека не разговарала за ситуацијата во Куба со американскиот претседател. Мексико е еден од најголемите добавувачи на нафта во земјата, но е и многу важен трговски партнер на Соединетите Американски Држави.
