Европската комисија во понеделник одобри 6,1 милијарди евра финансиска помош за Украина за купување системи за воздушна и ракетна одбрана, муниција и радари, како дел од заем од 90 милијарди евра.

„На Денот на независноста на Украина, Европа покажува дека нашата поддршка е непоколеблива и конкретна. Додека Русија ги засилува своите напади, ние ја засилуваме нашата помош за Украина за да ги заштити своите граѓани и да го одбрани своето небо“, изјави претседателката на Европската комисија, Урсула фон дер Лајен.

Според одобрениот план, повеќето производи ќе бидат набавени од европски компании.

Со оглед на зголемената употреба на балистички ракети и беспилотни летала со млазен погон од страна на Русија, Комисијата ја нагласува потребата ЕУ да ги зголеми испораките од преостанатите залихи, со повторно приоритизирање на нарачките и зголемување на производството.

Пред денешната одлука, на Украина ѝ беа одобрени планови за јавни набавки во вредност од 16 милијарди евра, од кои беа исплатени 8,35 милијарди евра. Украина ќе може да побара исплата на одобрените средства по потпишувањето договори со одбранбените компании.

Комисијата ќе ги разгледа овие договори пред исплатата за да се осигури дека финансиската помош се користи за набавки договорени со земјите-членки и Комисијата.