Претседателот на Иран, Масуд Пезешкијан, рече дека му наложил на министерот за надворешни работи да води „фер и правични преговори“ засновани на принципите на „достоинство, разумност и целесообразност“.

Во објава на социјалните мрежи, Пезешкијан истакнува дека директивата е издадена „поради барањата од пријателските влади во регионот“ со кои се повикува Иран да одговори на предлогот на американскиот претседател Доналд Трамп за преговори.

Сепак, тој нагласи дека за какви било преговори ќе биде потребна „соодветна средина“ ослободена од закани и „неразумни очекувања“, нагласувајќи дека преговорите мора да се одвиваат „во рамките на нашите национални интереси“.

Вчера, дел од иранските медиуми објавија дека Пезешкијан наредил продолжување на преговорите со Соединетите Американски Држави за нуклеарната програма, кои беа блокирани по 12-дневната војна со Израел во јуни 2025 година.

Се наведува дека преговорите би можеле наскоро да започнат, и најверојатно ќе се одвиваат меѓу иранскиот министер за надворешни работи, Абас Арагчи, и американскиот пратеник за Блискиот Исток, Стив Виткоф.

Подоцна, истите медиуми објавија дека наводите за непосредно продолжување на преговорите се непотврдени. Некои медиуми објавија дека Арагчи би можел да се сретне со Виткоф во Истанбул в петок.

Овој развој на настаните доаѓа во време на зголемена дипломатска активност, при што неколку регионални земји, вклучувајќи ја и Туркије според наводите, работат на ублажување на тензиите меѓу Техеран и Вашингтон.

Тензиите дополнително ескалираа откако претседателот Трамп изјави дека американската воена флота се движи кон регионот.