Поранешниот претседател на Соединетите Американски Држави Бил Клинтон и неговата сопруга и поранешна државна секретарка Хилари Клинтон ќе сведочат во конгресната истрага за осудениот сексуален престапник Џефри Епштајн, изјави официјален претставник.

Одлуката би можела да го спречи планираното гласање во Претставничкиот дом предводен од републиканците за да се прогласат Клинтонови за виновни за непочитување на судот, што би можело да доведе до кривични обвиненија и нивно апсење, објави Ројтерс.

Комитетот за надзор на Претставничкиот дом препорача таква мерка минатата недела поради нивното претходно одбивање да сведочат за нивната врска со Епштајн.

Клинтонови претходно понудија соработка со комисијата, но одбија да се појават лично, велејќи дека истрагата е партиска и има за цел да го заштити републиканскиот претседател на САД Доналд Трамп.

Заменик-шефот на нивниот кабинет, Ангел Урена, изјави дека тие веќе дале изјави под заклетва и се подготвени да сведочат, со порака дека сакаат да воспостават „преседан што важи за сите“.

Претседателот на Претставничкиот дом, Мајк Џонсон, ја поздрави одлуката, но не прецизираше дали планираното гласање за непочитување на судот ќе биде отфрлено.

„Очекуваме сите да ги почитуваат судските покани на Конгресот“, рече тој.

На почетокот на 2000., откако ја напушти функцијата, Бил Клинтон патувал со авионот на Епштајн неколку пати.

Подоцна изрази жалење за врската и изјави дека немал сознанија за криминалните активности на Епштајн.