Руските сили рано утрово почнале напад врз Киев, Харков и други поголеми градови во Украина, а во нападите се повредени луѓе и енергетската инфраструктура е оштетена, објавија украинските власти.

Четири лица се повредени во нападите, по две во Киев и Харков, објавија властите во двата најголеми украински града.

Во Киев, каде што ноќните температури паднаа на близу -20 степени Целзиусови, сведоци за Ројтерс пријавија експлозии по полноќ, за кои рекоа дека биле предизвикани од ракети и беспилотни летала.

Нападите предизвикале штета во пет области на Киев, биле погодени три станбени згради и зграда во која се наоѓа детска градинка, изјави шефот на воената администрација на градот, Тимур Ткаченко.

Тој додаде дека според моменталните податоци, најмалку две лица се повредени во нападите, пренесува Укринформ.

Предупредување за воздушен напад беше на сила во Киев повеќе од пет часа.

Градоначалникот на Харков, Игор Терехов, изјави дека нападите во овој град биле насочени кон енергетската инфраструктура.

„Целта е очигледна: да се предизвика максимално уништување и да се остави градот без греење при силен студ“, напиша Терехов на Телеграм.

Шефот на регионалната државна администрација на Харков, Олег Синегубов, објави дека две лица се повредени во руското гранатирање, пренесува „Униан“.

Русија и Украина минатата недела објавија дека ги прекинале нападите врз енергетската инфраструктура на другата страна, но не се согласиле околу временската рамка за прекин на ваквите напади.

Кремљ соопшти дека американскиот претседател Доналд Трамп лично го замолил рускиот претседател Владимир Путин да се воздржи од напади врз Киев до 1 февруари, додека Зеленски рече дека прекинот на нападите врз енергетските објекти треба да трае една недела, почнувајќи од 30 јануари.

„Температурата во Украина е под -20 степени Целзиусови, а во текот на ноќта Русија нападна со 450 беспилотни летала и над 60 ракети енергетски објекти и станбени куќи во Киев, Днепар, Харков, Суми, Одеса и други региони“, објави украинскиот министер за надворешни работи Андреј Сибиха.

Тој, исто така, изјави во објава на мрежата X дека Москва чекала температурите да паднат пред да го нападне енергетскиот систем на Украина.

„Ниту очекуваните дипломатски разговори во Абу Даби оваа недела, ниту неговите ветувања кон САД, не го спречија рускиот претседател Владимир Путин да продолжи да ги тероризира обичните луѓе за време на најсуровата зима“, напиша Сибиха.

Тој ги повика сојузниците да „ја зајакнат воздушната одбрана и енергетскиот отпор на Украина и да го зголемат притисокот врз Москва“.

„Ускратете ѝ на руската воена машинерија приходи од енергија и пристап до технологија. Изолирајте го рускиот режим. Запрете и конфискувајте ги нелегалните руски танкери за нафта. Путин мора да биде лишен од илузијата дека може да постигне нешто со своето бомбардирање, терор и агресија“, напиша Сибиха.

Градоначалникот на Киев, Виталиј Кличко, денес изјави дека 1.170 повеќекатни станбени згради во украинската престолнина останале без греење по ноќниот руски напад врз енергетската инфраструктура.