Српскиот претседател Александар Вучиќ во Минхен разговараше со кинескиот министер за надворешни работи Ванг Ји за клучните предизвици во глобалната безбедност, зачувувањето на мирот и подобрувањето на билатералната соработка, велејќи дека „Србија останува сигурен партнер на Кина во Европа“.

Средбата се одржа на маргините на 62-та Минхенска безбедносна конференција, на која Вучиќ учествува заедно со бројни светски лидери и високи функционери.

Вучиќ во објава на Инстаграм изјави дека разговарале за стабилноста на меѓународниот поредок и потребата од одговорен дијалог во услови на растечки геополитички тензии.

„Нагласив дека односите меѓу Србија и Кина се темелат на цврсто пријателство, меѓусебно почитување и сеопфатно стратешко партнерство што го изградивме заедно со претседателот на Народна Република Кина, Си Џинпинг“, рече Вучиќ.

Тој додаде дека е потврдена посветеноста за понатамошно подобрување на соработката во областите на инвестиции, енергетика, дигитална економија и иновации, како и придонес кон стабилноста на Западен Балкан преку отворен дијалог.

Вучиќ изјави дека Србија останува сигурен партнер на Кина во Европа и дека ќе продолжи да води одговорна и независна политика заснована на принципите на меѓународното право и зачувувањето на мирот. Тој, исто така, му ги пренесе своите поздрави на кинескиот претседател и му се заблагодари за поддршката за економскиот развој на Србија, нагласувајќи дека со нетрпение го очекува претстојниот состанок за време на неговата официјална посета на Кина.

Српскиот претседател присуствуваше и на отворањето на Минхенската безбедносна конференција, каде што се дискутира за европската безбедност и одбрана, иднината на трансатлантските односи и регионалните конфликти.

Вучиќ изјави дека, во време на сложени геополитички промени и растечка глобална несигурност, присуството на Србија на ваков собир е од исклучително значење за заштита на државните и безбедносните интереси, како и за зајакнување на меѓународната позиција на земјата.