Белгија официјално поднесе декларација за интервенција пред Меѓународниот суд на правдата (МСП) во случајот што Јужноафриканската Република (JAР) го покрена против Израел за наводни прекршувања на Конвенцијата за геноцид во Појасот Газа, објави Судот во вторник.

МСП потврди дека Белгија ја поднела својата декларација на 23 декември, повикувајќи се на член 63 од Статутот на Судот.

Член 63 предвидува дека државите кои се потписнички на конвенцијата што се толкува во постапката пред МСП имаат право да интервенираат.

Белгија нагласи дека нејзината интервенција се однесува на членовите од I до VI од Конвенцијата за геноцид, со посебен фокус на член II, особено во врска со толкувањето на „специфична намера“ потребна за утврдување на геноцидна намера.

Судот, во согласност со член 83 од Правилникот на Судот, ги покани и JAР и Израел да достават писмени забелешки за белгиската интервенција.

На 29 декември 2023 година, JAР поднесе тужба против Израел, обвинувајќи го за кршење на своите обврски според Конвенцијата за геноцид во третманот на Палестинците во Газа. Оттогаш, Судот издаде низа привремени мерки со кои му наредува на Израел да преземе чекори за спречување на акти на геноцид.

Меѓународниот суд на правдата, со седиште во Хаг, е главното судско тело на Обединетите нации и одлучува за правни спорови меѓу државите.