Забраната за користење на социјалните мрежи за лица под 16 години стапи на сила на полноќ по локално време во Австралија.

Платформите како Инстаграм, ТикТок и ЈуТјуб сега се должни да ги блокираат сметките на корисниците под 16 години или да се соочат со казни до 33 милиони долари, објави Ројтерс.

Забраната, пофалена од родителите и застапниците за заштита на децата, а критикувана од технолошките гиганти и застапниците за слобода на говорот, претставува прв практичен обид за регулирање на пристапот на децата до дигиталните платформи и се очекува да послужи како модел за другите земји што разгледуваат слични мерки.

„Иако Австралија е првата што усвои вакви ограничувања, малку е веројатно дека ќе биде последна“, рече професорката по интернет студии на Универзитетот Куртин, Тама Ливер.

Владите од Данска до Малезија, како и некои американски држави, веќе разгледуваат слични потези, истакнува Ројтерс.

Забраната првично опфаќа десет од најголемите платформи, вклучувајќи ги ЈуТјуб, Инстаграм и ТикТок, а листата ќе се проширува како што ќе се појавуваат нови производи и корисниците ќе се префрлаат на алтернативи.

Платформите ќе ја проценат возраста на корисникот користејќи алгоритми, податоци од документи за идентификација или поврзани банкарски информации.

Иако платформите тврдат дека забраната ја ограничува слободата на говорот и го загрозува идниот проток на корисници, владата истакнува дека целта е да се заштитат децата и да се намали штетното влијание на дигиталните медиуми.

Пред да стапи на сила забраната, 86 проценти од децата на возраст од осум до 15 години користеле социјални медиуми.

Комесарот за е-безбедност го ангажираше Универзитетот Стенфорд и 11 академици да го следат ефектот од забраната најмалку две години, за да може Австралија да им обезбеди податоци на регулаторите и законодавците ширум светот.

Директорот на Центарот за вештачка интелигенција, доверба и управување на Универзитетот во Сиднеј, Тери Флу, рече дека „деновите на неограничено самоизразување на социјалните мрежи за деца полека минуваат“, нагласувајќи ја важноста на новата регулатива.