Членството во Европската Унија не е гаранција за безбедност, туку процес базиран на заслуги, изјави унгарскиот премиер Виктор Орбан, одговарајќи на изјавата на финскиот претседател Александар Стуб дека најсилната гаранција за безбедноста на Украина е членството во ЕУ.

„Членството во ЕУ не е гаранција за безбедност, туку процес базиран на заслуги. Доколку тоа беше навистина најсилната гаранција за безбедност, тогаш Финска немаше да има причина да се приклучи на НАТО. Забрзаното пристапување на Украина во ЕУ нема да ја зајакне нашата Унија - тоа директно би ја вовлекло заканата од војна во неа. Ние предлагаме поразумен пристап“, објави Орбан на мрежата X.

На заедничката прес-конференција со украинскиот претседател Володимир Зеленски во Киев, Стуб вчера изјави дека најсилната гаранција за безбедност и најсилниот пример за стратешкиот пораз на Путиновата Русија е членството на Украина во ЕУ.