Катарскиот премиер Мохамед бин Абдулрахман бин Јасим Ал Тани денес во интервју за арапската новинска агенција Ал Џезира изјави дека повлекувањето на Израел од Појасот Газа, како што е опишано во планот на Белата куќа за завршување на војната, бара „појаснување и дискусија“.

Тој додаде дека завршувањето на војната е „јасна ставка во планот“, но истакна дека планот споменува повоена влада во Појасот Газа, што ќе биде предмет на разговори со Американците, но „нема никаква врска со Израел“, пренесува Ројтерс.

„Планот е во рана фаза и треба дополнително да се развива. Се обидуваме да создадеме пат што ги зачувува правата на Палестинците“, додаде катарскиот премиер.

Египет и Катар, посредници во напорите за завршување на војната во Газа, потврдија претходно денес дека го доставиле планот на американскиот претседател Доналд Трамп за завршување на војната во Појасот Газа „денот потоа“ до палестинската милитантна група Хамас, истакнувајќи дека палестинската група ветила дека „објективно ќе го проучи“.

Американската телевизиска мрежа Си-Ен-Ен објави претходно денес дека американскиот претседател Доналд Трамп предупредил дека Хамас има 3 до 4 дена да се изјасни дали го прифаќадоговорот.

„Само чекаме Хамас да го стори тоа или да не го стори. Но ако не го стори тоа, тоа ќе биде многу тажен крај“, оцени американскиот претседател.