Presidenti egjiptian Abdel Fattah al-Sisi ftoi kancelarin gjerman Friedrich Merz të premten të marrë pjesë në ceremoninë e nënshkrimit të një marrëveshjeje armëpushimi në Gaza.

Faza e parë e marrëveshjes së armëpushimit midis Izraelit dhe Hamasit hyri në fuqi të premten, pas dy vitesh sulmesh izraelite ndaj Gazës, me ndërmjetësimin e Türkiyes, Egjiptit dhe Katarit, nën mbikëqyrjen e ShBA-së.

Sipas deklaratës së presidencës egjiptiane, Sisi prezantoi detajet e marrëveshjes dhe mekanizmat për zbatimin e fazës së ardhshme, duke theksuar rëndësinë e “ruajtjes së rolit të Autoritetit Palestinez dhe krijimit të kushteve për themelimin e një shteti palestinez, në përputhje me legjitimitetin ndërkombëtar”.

Egjipti ende nuk ka njoftuar datën e ceremonisë së nënshkrimit, por Sisi ka shprehur shpresën për të pritur Presidentin amerikan Donald Trump në Kajro për të marrë pjesë në ceremoni.

Nga ana e tij, kancelari Merz vlerësoi rolin vendimtar të Egjiptit në arritjen e marrëveshjes dhe theksoi mbështetjen e Gjermanisë për paqe të qëndrueshme në rajon.

Gjatë bisedës u diskutua gjithashtu forcimi i marrëdhënieve dypalëshe mes Egjiptit dhe Gjermanisë, si dhe lidhjet e Egjiptit me Bashkimin Evropian.

Trump njoftoi të mërkurën se Izraeli dhe Hamasi kishin rënë dakord për fazën e parë të planit të tij 20-pikësh, të shpallur më 29 shtator, që parashikon armëpushim, lirimin e të gjithë pengjeve izraelite në këmbim të rreth 2.000 të burgosurve palestinezë, dhe tërheqjen graduale të forcave izraelite nga gjithë Rripi i Gazës.

Faza e dytë e planit parashikon krijimin e një mekanizmi të ri qeverisës në Gaza pa pjesëmarrjen e Hamasit, formimin e një force sigurie me palestinezë dhe trupa nga vende arabe e islame, si dhe çarmatimin e Hamasit.

Që nga tetori i vitit 2023, sulmet izraelite kanë vrarë gati 67.200 palestinezë, shumica gra dhe fëmijë, duke e bërë enklavën të pabanueshme.