Еден маж е уапсен поради наводен кибернапад што предизвикал нарушувања на аеродромот Хитроу и други европски аеродроми, соопшти британската Национална агенција за борба против криминалот (НЦА)во среда.

Во соопштението, НЦА информира дека е започната истрага за инцидентот од 19 септември што влијаеше на летовите на Хитроу во Лондон и другите европски аеродроми во текот на викендот. Осомничениот, кој е на возраст од 40-ина години, е уапсен во Западен Сасекс во вторник под сомнение за злоупотреба на компјутери и е ослободен со кауција.

Заменик-директорот на НЦА и раководител на Националната единица за киберкриминал на НЦA, Пол Фостер рече дека, иако апсењето е позитивен чекор, истрагата за инцидентот е во рана фаза и сè уште е во тек.

Кибер-криминалот е постојана глобална закана што продолжува да предизвикува значителни нарушувања во Обединетото Кралство, рече тој.

Кибер-нападот го погоди американскиот давател на аеродромски услуги „Колинс Аероспејс“ овој месец, нарушувајќи ги системите за пријавување и бординг на аеродромите Хитроу во Лондон и Брисел, Берлин и Даблин.