Кабелот за пренос на податоци меѓу Финска и Германија под Балтичкото Море е прекинат и се истражува причината за прекинот, соопштија денеска финските власти.

Финскиот државен провајдер на услуги за податоци Циниа (Cinia) соопшти дека денеска е откриен „дефект“ на кабелот Ц-Лион1, кој поминува под морето на речиси 1.200 километри од финската престолнина Хелсинки до германскиот пристанишен град Росток.

Циниа, објави дека меѓународните конекции за податоци на Финска, како и телекомуникациските врски, се обезбедуваат преку неколку правци, а ефектите од дефект на еден кабел ќе зависат од нивото на безбедност на врските на давателот на услугата.

Ц-Лион1, пуштен во работа во 2016 година, е единствениот фински кабел за податоци што се протега од нордиската земја директно до централна Европа, според финскиот јавен радиодифузер ИЛЕ.

Финските медиуми забележаа дека трасата на кабелот до Германија минува во близина на двата гасоводи „Северен тек“ меѓу Русија и Германија кои во моментов не функционираат.

Самули Бергстром, шеф за комуникации во Финскиот национален центар за сајбер безбедност, го потврди прекинот на кабелот, што влијаеше на меѓународните врски на земјата.

„Сепак, добро е да се има предвид дека конекциите за податоци надвор од Финска доаѓаат од неколку различни места. Сега една од овие врски е прекината, што може да ги оптоварува другите, но ефектите веројатно не се видливи за просечниот граѓанин“, изјави Бергстром.

Финската служба за безбедност и разузнавање соопшти дека е премногу рано да се процени причината за кинењето на кабелот, односно дали станува збор за саботажа.