Полска во петокот регистрирала влез на летечки објекти од Русија во нејзиниот воздушен простор, вклучувајќи, најверојатно крстосувачка ракета Kх-101, изјави министерот за одбрана Владислав Косињак Камиш, додавајќи дека ќе побара од НАТО дополнителна поддршка за источното крило.
„Сведоци сме на уште една провокација од страна на Руската Федерација“, изјави Владислав Косињак-Камиш пред новинарите, индиректно поврзувајќи го влезот на руска ракета во полскиот воздушен простор со воените вежби на Коалицијата на подготвените.
Воените набљудувачи кои се служат со отворени извори (OСИНT) претходно објавија дека барем еден од неидентификуваните објекти бил крстосувачка ракета Kх-101, додека другите не биле идентификувани.
Полските воздухопловни сили кренаа авиони како мерка на претпазливост како одговор на воздушните напади на Русија врз Украина синоќа.
Во меѓувреме, полицијата, пожарникарите, војската и канцеларијата на државниот обвинител ги истражуваат извештаите за пад на ракета или можеби дури и вооружен дрон на територијата на Полска, изјави Јацек Горишевски, портпарол на оперативната команда на вооружените сили.
Експлозијата, која е снимена на сигурносни камери од куќи во близина, е пријавена во близина на селото Хмиелек, во југоисточна Полска, на околу 45 километри од украинската граница.
Снимките што кружат на социјалните мрежи наводно ја покажуваат експлозијата, која се случила околу 6:35 часот по локално време. Досега, официјално не е потврдено за каков предмет станува збор или од каде потекнува.
„Службите биле информирани од локалното население, а на терен бил испратен тим за да го обезбеди подрачјето и да ја утврди локацијата на падот доколку навистина се случил“, рече Горишевски.
Полскиот премиер Доналд Туск изјави дека добил извештаи за безбедносната состојба во подрачјето и дека во моментов нема закана од воздух.
Полскиот претседател, исто така, бил информиран за ситуацијата.













