Најреалниот период за постигнување дипломатско решение со кое би завршила војната на Русија против Украина е од крајот на 2026 до летото 2027 година, изјави во неделата украинскиот претседател Володимир Зеленски.
Говорејќи на церемонијата по повод Денот на националното знаме во Киев, Зеленски рече дека двете страни и натаму се поделени околу прашањето за повлекување на Украина од Донбас, како дел од напорите за постигнување договор.
„Сметаме дека ова е најактивната фаза во која дипломатијата може да доведе до завршување на војната. Тоа е крајот на оваа година и крајот на летото 2027 година“, рече тој.
Една од опциите за прекин на огнот за која се разговара со САД и Европа предвидува заемно повлекување на силите и создавање тампонска „слободна економска зона“ со која би управувала трета страна, рече тој.
Украина е подготвена да разговара за взаемно запирање на нападите врз енергетската и земјоделската инфраструктура, додаде тој.
На неделниот настан учествуваа лидерите на скандинавските земји и балтичките држави.
Недостиг во буџетот за одбрана
Зеленски, исто така, рече дека Украина се соочува со недостиг од 27 милијарди долари во буџетот за одбрана, при што однапред се потребни меѓу 8 и 10 милијарди долари за покривање на почетокот на 2027 година.
Уште речиси 20 милијарди долари се потребни за воените плати, исплатите за семејствата на војниците загинати на фронтот и други трошоци, рече тој.
Украинскиот претседател рече дека Киев сè уште нема достигнато масовно производство на сопствени балистички ракети поради технички проблеми, додавајќи дека на програмата работат две компании.
„Кога ќе има масовно производство, тогаш ќе можеме да изведуваме болни удари врз непријателот како одговор на неговиот терор“, рече тој.
Според него, Украина би можела да започне со производство на ракети за системите за противвоздушна одбрана „Патриот“ заедно со „Рејтеон“.
Тој рече дека американската компанија веќе одржала првична техничка средба со украински претставници, додека украинската одбранбена компанија „Фајр Поинт“ била избрана за партнер во проектот.
Зеленски истакна дека Киев во следните недели очекува проценка за временската рамка и изводливоста на проектот.
Тој, исто така, најави испорака на француски радари за противвоздушна одбрана и систем „САМП/Т“ наесен, додавајќи дека се очекува во септември да бидат потпишани договори за дополнителни ракети „Астер 30“.
Зеленски, исто така, рече дека Украина постигнала договор со германскиот канцелар Фридрих Мерц за испорака на 600 ракети „ПАК-2“ за системите „Патриот“ во периодот 2027–2028 година, при што истакна дека ракетите „ПАК-2“ можат да пресретнуваат и балистички ракети, иако за такви пресретнувања се потребни повеќе ракети-пресретнувачи.
Според него, на Украина ѝ се потребни околу 360 ракети „Патриот“ за зимскиот период, додека глобалното годишно производство изнесува околу 600.
Исклучува одржување избори за време на војната
Зеленски, исто така, рече дека основачот на „СпејсЕкс“, Илон Маск, го одбил барањето на Украина за користење на сателитските комуникации „Старлинк“ над руската територија за одбранбени цели.
Во исто време, Зеленски рече дека Украина сега добива поохрабрувачки сигнали од тимот на Маск и продолжува да бара решение.
Тој, исто така, потврди дека Украина намерно ги таргетирала магацините на „Вајлдберис“, најголемиот руски онлајн трговец.
„Зошто конкретно го напаѓаме „Вајлдберис“? Затоа што станува збор и за снабдување со воена опрема и за големи суми пари“, рече тој.
Во однос на внатрешната политика, Зеленски го опиша одржувањето избори за време на војната како „цунами за државата“, кое би можело да ја подели Украина.
Тој, исто така, рече дека антикорупциските агенции треба да функционираат независно.
Коментирајќи ја истрагата во која се вклучени високи функционери во кабинетот на претседателот, Зеленски рече дека постоеле доволно основи веднаш да биде разрешена заменичката на шефот на кабинетот на претседателот, Ирина Мудра, откако биле извршени претреси во нејзините простории.
