Не бараме од Унијата да заземе страна, туку да помогне во создавање услови за одржливо европско решение во кое договореното ќе биде јасно. Обврските да важат за сите, а процесот на пристапување нема повторно да биде отворен за нови билатерални условувања, рече македонскиот премиер Мицкоски во врска со односите со Бугарија на прес конференција во Владата по средбата со претседателката на Европската комисија Урсула фон дер Лајен.

По сугестија на фон дер Лајен Мицкоски истакна дека македонската страна презела иницијатива за откочување на дијалогот со Бугарија. Македонската страна ќе побара билатерална средба на ниво на министри за надворешни работи. Министерот за надворешни работи и надворешна трговија Тимчо Муцунски следната недела патува во Софија во рамки на соработката за проектите од Коридорот 8.

„ Јас веднаш побарав од министерот да испрати дипломатска нота и да побара време за средба и состанок со неговата колешка и да почнеме процесот од некаде да го движиме. Нашата определба како држава е јасна и останува непроменета. Сакаме да бидеме дел од Европската Унија и посветено работиме на таа цел. Ако од нас се очекуваат одлуки со долгорочни последици, тогаш е оправдано да очекуваме и јасна европска перспектива за она што следува потоа” посочи Мицкоски.

Претседателката на Европската комисија истакна дека земјата веќе докажала дека може да носи храбри одлуки како во случајот со Преспанскиот договор. Патоказите како што рече се однесуваат на земјите кои веќе се навлезени во процесот, но дека според неа доколку се најде решение со Бугарија пристапниот процес може да оди многу брзо бидејќи земјата како што рече има импресивен напредок во делот на реформите. Таа се осврна и на македонскиот идентитет и јазик.

„ Се договоривме да имаме еден прв нов чекор следната недела и да се обидеме да го деблокираме процесот и, всушност, да го претвориме во процес. Тоа е најважниот дел. Ние ќе ѝ посакаме добредојде на Северна Македонија со нејзиниот идентитет и со нејзиниот јазик. Веруваме дека македонската култура и македонскиот јазик можат да ја направат нашата Унија побогата”, рече фон дер Лајен.

Посетата на фон дер Лајен на Скопје беше дел од бејзината балканска турнеја во ги посети и Албанија, Црна Гора и Косово. Босна и Херцеговина и Србија не се на агендата на еврокомесарката поради изборите во овие две земји.