Чамец со група мигранти се превртел рано во четврток на реката Сава во близина на Славонски Брод во Хрватска. Според првите информации, наводно во чамецот имало 13 лица. Сите се извлечени од водата, но едно лице починало, а друго е на реанимација.

„Полицијата реагираше веднаш откако добивме информации за настанот околу пет часот наутро. Заедно со други служби, им дојдовме на помош на жртвите. Неколку лица беа извлечени од водата, едно, за жал, почина, додека другото е на реанимација. Другите беа хипотермични и префрлени во болница“, изјави портпаролката на полицијата, Ката Нујиќ.

Повредените се пренесени во Општата болница „Д-р Јосип Бенчевиќ“ во Славонски Брод.

„Полициските службеници веднаш дојдоа на помош и извлекоа 13 лица (странски државјани) од студената река Сава, од кои едно не покажуваше знаци на живот. Сите хипотермични лица беа транспортирани и згрижени во болницата во Славонски Брод. Граѓанин на Босна и Херцеговина, кој е поврзан со извршување на кривичното дело криумчарење мигранти, исто така е во болница и под полициски надзор. Полициските службеници продолжуваат со понатамошна работа и кривична истрага за утврдување на фактите и околностите на споменатиот настан“, рекоа од Бродско-посавската полициска управа.

За време на пребарувањето бил користен дрон, а навигацијата по реката Сава во зоната на пребарување била привремено прекината.