Министрите за надворешни работи на европските земји го прославија Денот на Европа во Украина во петокот, покажувајќи единство и изразувајќи континуирана поддршка за таа земја во услови на војна со Русија.

„Денес го славиме Денот на Европа со Украина и нејзиниот народ. Бидејќи радостите и тешкотиите се споделуваат во едно семејство“, објави шефицата за надворешна политика на ЕУ, Каја Калас, на социјалната мрежа X.

„Заедно со министрите за надворешни работи, ние сме обединети со Украина за траен мир. За иднина во која веруваме“, додаде таа.

Британскиот министер за надворешни работи, Дејвид Лами, им се придружи на уште 17 министри за надворешни работи и на украинскиот министер за надворешни работи во западниот град Лвов, соопшти британската влада, каде што ќе разговараат за обезбедување мир во Украина.

Исто така, се очекува претставници на најмалку 37 земји да ја објават својата поддршка за формирање на специјален суд за изведување пред лицето на правдата на одговорните за „злосторството агресија против Украина“.

Денот на Европа, кој се слави на 9 мај, потсетува на Шумановата декларација од 1950 година, со која се поставија темелите на Европската Унија и симболизира мир и единство низ целиот континент.