Централната изборна комисија (ЦИК) на Косово го верификуваше избирачкиот список во и надвор од Косово за предвремените парламентарни избори, што ќе се одржат на 28 декември 2025 година, пренесува Анадолу.
Портпаролот на ЦИК, Валмир Елези, посочи дека според податоците од овој список, бројот на граѓани на Косово со право на глас во овој изборен процес е 2.076.290 гласачи.
„Според податоците од Избирачкиот список, бројот на граѓани со право на глас на избирачките места во Република Косово е 1.999.205 гласачи, додека бројот на граѓани кои се регистрирани за гласање надвор од Косово е 77.085 гласачи“, рече Елези.
Тој објави дека списокот за изборите на 28 декември содржи 7.192 гласачи повеќе отколку на локалните избори одржани на 12 октомври 2025 година.
ЦИК во средата сертифицираше 1.146 кандидати за пратеници од 23 политички субјекти кои ќе учествуваат на парламентарните избори.
