Глобалната продажба на новата серија ајФон 17 на Епл почна денес и привлече долги редици купувачи од Пекинг до Лондон, а најголемата битка ќе се води на кинескиот пазар, каде што американската компанија има само 10% удел.

Цената на основниот модел остана непроменета во споредба со претходната година и покрај зголемениот мемориски простор, што, според анализата на компанијата Омдиа, треба да ја зголеми продажбата, објавува Си-Ен-Ен.

Успешното лансирање на продажбата би можело да ги смири инвеститорите кои се загрижени дека Епл заостанува зад конкуренцијата во областа на вештачката интелигенција.

Компанијата започна, како што објави Блумберг, тригодишен план за целосна трансформација на дизајнот на ајФон, со кој сака да го врати чувството на задоволство кај клиентите.

Првиот чекор веќе беше направен овој месец кога беше претставен „ајФон Ер“, потенок и полесен модел со минималистички дизајн, кој бараше одредени компромиси како што се пократок век на траење на батеријата, отсуство на слот за СИМ картичка и само една задна камера.

Вистинскиот пробив ќе пристигне во 2026 година - првиот ајФон на Епл што може да се свиткува со четири камери и подобрен модем, со кодно име В68. Дизајнот ќе наликува на преклопните модели на Самсунг што го претвораат телефонот во мал таблет.

Во 2027 година, по повод 20-тиот роденден на ајФон, компанијата Епл ќе претстави нов модел со искривен дизајн и нов интерфејс „течно стакло“.