Според податоците во реално време од „IQAir“, швајцарска компанија што го следи квалитетот на воздухот во светот, Скопје и Сараево се рангирани меѓу големите градови со најзагаден воздух во светот.

На листата на големи градови со највисок индекс на загадување на воздухот (AQI), Сараево е рангиран на второ место во светот, со високо ниво на честички PM2,5, што се смета за опасно за здравјето. На ова рангирање главниот град на Босна и Херцеговина се наоѓа само по градот Лахор во Пакистан.

Македонскиот главен град Скопје, исто така, е рангиран многу високо, на петто место во светот по загадување на воздухот, а пред него, на трето и четврто место, се Калкута и Њу Делхи во Индија.

Овие податоци покажуваат дека воздухот во овие два града значително ги надминува вредностите препорачани од Светската здравствена организација, особено за фините честички ПМ 2,5 што се поврзани со респираторни и кардиоваскуларни заболувања.

Според експертите, главни причини за загадување на воздухот во регионот се големата употреба на јаглен и горива со низок квалитет, големиот број стари возила со слаби системи за филтрирање, недоволно ефикасните контроли во индустриските зони и географските услови што ја ограничуваат циркулацијата на воздухот, предизвикувајќи акумулација на загаден воздух во урбаните центри.