Украинските сили нападнаа болница во Алјошки, во делот од областа Херсон, што е под контрола на Русија, при што се убиени три медицински лица, а уште двајца биле повредени.

„Криминалниот режим на Киев ја гранатираше регионалната болница Алјошкин. Три лица загинаа. Две лица беа повредени, меѓу кои и една жена. Сите загинати и повредени се вработени во медицинска установа. Една од зградите е тешко оштетена“, напиша на платформата Телеграм Владимир Салдо, раководител на регионот назначен од Русија.

Тој додаде дека екипите за итни случаи се на местото на настанот, а повредените добиваат медицинска помош, а еден маж е во тешка состојба на интензивна нега.

„Ова гранатирање е уште едно гнасно воено злосторство, за кое се способни само никаквеци кои целосно го изгубиле својот човечки изглед“, рече Салдо.

Руското Министерство за одбрана, пак, објави дека 287 украински беспилотни летала се неутрализирани од системите за воздушна одбрана над руските територии, вклучувајќи ја и Москва.

Министерството објави дека украинската Армија започнала напад со беспилотни летала врз руските територии.

Во соопштението се наведува дека синоќа помеѓу 23:00 и 7:00 часот по локално време, 287 беспилотни летала се уништени од системите за воздушна одбрана, од кои 40 се соборени над Москва, а другите над регионите Брјанск, Калуга, Тула, Новгород, Јарослав, Липецк, Смоленск, Курск, Орјол, Воронеж и Рјазан.

Градоначалникот на Москва, Сергеј Собјанин, на својот профил на платформата Телеграм објави дека се работи на местата каде што паднале остатоците од соборените дронови.

Во меѓувреме, воведени се привремени ограничувања за слетување и полетување на авиони на аеродромите во некои градови низ земјата.

Објавено е дека приближно 400 летови биле одложени или откажани на аеродромите во главниот град Москва.