Српскиот претседател Александар Вучиќ изјави дека повторно би можел да биде премиер на земјата.

Тој рече дека нема да го менува Уставот за да може повторно да се кандидира за претседател.

„Луѓето овде лажеа: „Вучиќ ќе го промени Уставот, повторно ќе се кандидира“. Не, секако дека тоа нема да се случи. Можеби ќе го промениме Уставот во врска со некои други прашања, но за ова, тоа нема да се случи. Барем не за време на мојот мандат“, рече Вучиќ.

Тој нагласи дека можe да бидe премиер, но за тоа е потребна јавна поддршка.

„И не е лесно по ниту едно прашање. Да ја дефинирам политичката ситуација во Србија денес: секогаш им велам на моите колеги, пријатели, „не бидете премногу оптимистични и не ги потценувајте нашите противници“. Ќе биде многу тешко, многу тешка работа е пред нас, но барем нема да биде лесно ниту за нив. Од друга страна, малку сум уморен, исцрпен и би сакал да најдам некои други луѓе кои ќе ја работат таа работа во иднина. Сè уште нема конечна одлука. Ќе ја донесеме заедно во следните шест месеци“, рече претседателот на Србија.

Вучиќ беше премиер на Србија од 27 април 2014 година до 29 мај 2017 година.

За разлика од претседателските мандати, Уставот на Србија не го ограничува бројот на премиерски мандати.