Ефектите од климатските промени веќе принудија милиони луѓе ширум светот да ги напуштат своите домови, според бројките објавени од Агенцијата за бегалци на ОН (УНХЦР) пред 30-та годишна Конференција на ОН за климатски промени што започнува во Бразил во понеделник.
„Во текот на изминатата деценија, катастрофите поврзани со временските услови предизвикаа внатрешно раселување на 250 милиони луѓе, односно повеќе од 67.000 раселени дневно, според извештајот на агенцијата.
Организацијата зборува за маѓепсаниот круг на конфликти и климатски кризи.
Три четвртини од луѓето раселени поради конфликт живеат во земји кои се особено ранливи на ефектите од климатските промени.
УНХЦР, меѓу другото, ги наведува поплавите во Јужен Судан и Бразил, рекордната топлина во Кенија и Пакистан и недостигот на вода во Чад и Етиопија.
„Климатските промени ги влошуваат и ги множат предизвиците со кои се соочуваат веќе раселените, како и земјите домаќини, особено во нестабилните и погодените од конфликт средини“, се вели во извештајот.
Само една четвртина од средствата достапни за прилагодување кон последиците од климатските промени стигнале до земјите во ризик, кои честопати самите примиле многу бегалци, додава УНХЦР.
Годишниот климатски самит на ОН, познат како ЦOП30, често се користи како сцена за посиромашните земји да побараат повеќе средства од попросперитетни земји за да се прилагодат на сè понепријателската клима.
„Ако сакаме стабилност, мора да инвестираме таму каде што луѓето се најмногу изложени на ризик. За да се спречи понатамошно раселување, финансирањето на климатските мерки мора да стигне до заедниците кои веќе живеат на работ“, рече шефот на УНХЦР, Филипо Гранди.
Гранди понатаму ги повика учесниците на климатската конференција да ги одржат своите ветувања: „Овој ЦOП мора да резултира со реални акции, а не со празни ветувања“.
Околу 50.000 учесници од повеќе од 190 земји се среќаваат оваа недела во бразилскиот град Белем, во амазонската дождовна шума, на двонеделни разговори за климатската криза и нејзините разорни последици.
